Sa Dulo Ng Mga Kuko

May Krisis Ba Talaga?

January 23, 2009

Anu ba talaga ang tunay na nangyayari sa mundo? Pabagsak na ba talaga ang ekonomiya ng ilang bansa? Sa tunay lang, ayaw kong malaman ang totoo. Nagdudulot lang ito ng lubos na pangamba at pilit nitong pinipihit ang pihitan sa utak ko — ang antisipasyon o ang pagiging maagap.

Naaalala ko tuloy ang mga nangyari noong 1999, alam mo iyon? yung tungkol sa Y2K? Ang sabi ng ilan ay babagsak ang mga ilang industriya na gumagamit ng computer o nalilinya sa teknolohiyang makabago. Pero wala namang nangyari na malaki ang naging epekto sa bansa di ba? Mabuhay ang makalumang sistema! He he he.

Ganun pa man, ang dapat lang na gawin sa ganitong sitwasyon ay ang maghanda at magtipid. Dahil wala naman talagang nakakaalam kung ano talaga ang susunod na mangyayari.

Ang blog na ito ay nangangahulugan lamang na may pakialam na ako sa mga nangyayari sa paligid ko, dati kasi ay hindi naman masyado. Konti lang dahil hindi naman ako maapektuhan noon. Pero ngayon ay iba na, dahil may mga nakalatag na akong mga makabuluhang plano para sa kinabukasan ko at sa kinabukasan naming dalawa ng mayumi kong kabiyak na si Juvy.

Sa kasalukuyan, ipa-pagpatuloy lang ang mga nasimulan na pangako sa sarili ako. Ang ilan sa mga ito ay sumusunod:

(1) Ang pagbubuo ng Guitar Ensemble. Mayroon na akong posibleng 15 hanggang 20 estudyante na tutugtog ng ilan sa mga areglo kong piyesa :

Mexican Hat Dance, La Bamba, William Tell Overture, Pirates of the Caribbean, James Bond 007 Theme, Mission: Impossible Theme, The Godfather Theme at iba pang musika kasalukuyan pang ginagawan pa ng areglo. Patnubay ng Maykapal ang kailangan.

(2) Ang pag-iwas sa pagbili o pagtingin ng mga bagay (elektroniks) na hindi naman talaga kailangan. (laptop, mobile phone, external hard drive, DSLR, atbp)

(3) Ang pagkain sa mga restaurant na medyo mahal at pagbili ng mga luto na pagkain. Maging ang mga pagkain na may cocoa.

(4) Ang pagbabasa (araw-araw) ng ilang aklat o artikulo na may kinalaman sa musika at sa pagtugtog ng gitara.

Ganun lang. Maghanda sa kinabukasan at manatiling positibo sa lahat ng bagay — nangyari, nangyayari at mangyayari.

Entry Filed under: Mga Pala-Palagay at Muni-Muni. .